چیئرمین تحریک انصاف عمران خان نے کہا ہے کہ ملکی ترقی کا بہت سا انحصار انفارمیشن ٹیکنالوجی کے فروغ میں ہے۔
تفصیلات کے مطابق انفارمیشن ٹیکنالوجی کے شعبے سے وابستہ شخصیات کے نمائندہ وفد کی زمان پارک آمد ہوئی جہاں انہوں نے چیئرمین تحریک انصاف عمران خان سے خصوصی ملاقات کی۔
ملاقات میں حکومتیں بدلنے سے پالیسیاں تبدیل ہونے سے انڈسٹری کو نقصان پر شدید تشویش کا اظہار اور پالیسیوں کے تسلسل پر زور دیا گیا۔
اس موقع پر چیئرمین تحریک انصاف عمران خان نے کہا کہ ملکی ترقی کا بہت سا انحصار انفارمیشن ٹیکنالوجی کے فروغ میں ہے، تحریک انصاف کے دورِ حکومت میں آئی ٹی شعبے کی برآمدات میں نمایاں اضافہ ہوا۔
سابق وزیراعظم اور چیئرمین تحریک انصاف عمران خان نے مزید کہا کہ تحریک انصاف دوبارہ آئی ٹی کے فروغ و ترقی کا اہتمام کرے گی۔
ملاقات کرنے والوں میں اوپن سیلیکان ویلی کے صدر جنید قریشی، صدر اوپن لاہور کنول چیمہ، جنرل سیکرٹری لاہور کاشف الحق اور سلیم رانجھا شامل تھے جبکہ صوبائی وزیر انفارمیشن اور ٹیکنالوجی ڈاکٹر ارسلان خالد بھی ملاقات میں موجود تھے۔