سرکاری اعداد و شمار سے ظاہر ہوتا ہے کہ حکومت کی جانب سے سخت ترین معیار کے باوجود گلگت بلتستان کے طلباء نے جماعت پنجم اور آٹھویں کے بورڈ آف ایلیمنٹری امتحانات میں اپنے نتائج کو بہتر کیا ہے۔ پہلی بار اس سال پاسنگ مارکس کو 33 فیصد سے بڑھاکر 40 فیصد کر کے اور 30 فیصد نمبروں کے فارمیٹو اسیسمنٹ متعارف کروا کر پاسنگ کے معیار کو مزید سخت کر دیا گیا ہے۔ اب بھی نتائج کا تجزیہ ظاہر کرتا ہے کہ حالیہ گلگت بلتستان سطح کے امتحان میں ایلیمنٹری اسکول کے طلباء کی مجموعی تعلیمی کارکردگی 77 فیصد سے 87 فیصد تک بہتر ہو گئی ہے۔ چیف سیکرٹری گلگت بلتستان محی الدین وانی کی جانب سے شیئر کردہ اعداد و شمار کے مطابق صوبہ بھر میں جماعت پنجم سے تعلق رکھنے والے طلباء کا مجموعی نتیجہ پچھلے سال کے مقابلے میں 69 فیصد سے بڑھ کر 81 فیصد ہو گیا جبکہ آٹھویں جماعت کے طلباء کے نتائج 86 فیصد سے 94 فیصد تک بہتر ہوئے۔ اعداد و شمار کے مطابق مجموعی طور پر صوبے بھر میں پانچویں اور آٹھویں جماعت کے سینٹرلائزڈ امتحان میں کل 30065 مرد و خواتین نے شرکت کی۔ ان میں سے امتحانات میں کامیاب ہونے والے طلباء کی کل تعداد 25814 رہی۔